物有所值　般費「鐵人數據」英超最強

曼聯日前宣布同隊長般奴費南迪斯續約至2027年，據悉呢位29歲葡萄牙國腳獲加人工至35萬鎊(約350萬港元)周薪，成為隊內最高薪球員之一。根據英國傳媒統計，般費自2020年1月底加盟曼聯以來，總共上陣234場英超，屬於同期英超披甲次數最多嘅球員，高人工物有所值。

般奴費南迪斯成「魔」後甚少缺陣，上季英超僅3場冇上陣，至今累積踢234場聯賽，以同時期計算，比第2位曼城中場洛迪卡斯簡迪多9場，至於第3位都係曼城中場貝拿度施華，踢咗219場英超，第4位係上陣213場嘅利物浦前鋒穆罕默德沙拿，菲爾科頓以211場排第5位。

曼聯將於周六(17日)凌晨新一季英超揭幕戰，主場對富咸，相信般奴費南迪斯會擔任正選。