蘭尼約路跖骨有事　原來曼聯一早知

曼聯新簽法國天才中堅蘭尼約路，在美國集訓期間跖骨受傷，要休息3個月，原來早在簽約前身體檢查，曼聯已經發現佢跖骨有問題，但仍然照樣簽約，認為長遠對球隊有利。

英國傳媒報道，曼聯早在身體檢查已發現蘭尼約路跖骨有問題，高層仍然決定簽約，係因為佢哋堅信，18歲嘅蘭尼約路係球隊未來10年嘅關鍵球員，如果曼聯中止交易，蘭尼約路就會加盟皇馬。

簽約蘭尼約路後，曼聯對佢悉心照顧，僅安排其他球員一半訓練量，可惜佢仍然受傷，蘭尼約路受傷後，曼聯容許佢繼續留在美國跟隨，返英國後先做手術，當正佢係「金叵蘿」。

蘭尼約路將會養傷3個月，不過原來就算佢好番，曼聯都唔打算畀佢急住復出，而係會好好保護佢，慳住用，至於近日由拜仁慕尼黑簽入嘅馬菲斯迪歷特，先係「粗用」嘅球員。