加拿祖錯失「世紀空門」　網民：佢同C朗仲相差好遠

曼聯喺英超開鑼戰以1比0擊敗富咸，阿歷真度加拿祖後備上陣，貢獻1次助攻，但呢位20歲阿根廷國腳亦錯失1次射空門機會，幸好球隊仍然全取3分，否則加拿祖由功臣變罪人，網民抽水指佢同偶像C朗仲相差好遠。

當時踢到補時，富咸防線犯錯，拉舒福特截到波之後「單刀橫傳」畀位置更佳嘅阿歷真度加拿祖，點知佢竟然射出界。兩人都遭到網民批評，包括話：「拉舒福特應該自己射，佢太冇信心。」、「傳得差，射得更差」、「加拿祖成日扮C朗，佢同C朗仲相差好遠。」

賽後曼聯助教雲尼斯達萊第一時間搵加拿祖「傾偈」，「雲佬」今季回巢紅魔鬼，主要工作指導進攻球員射門，但拉舒福特同加拿祖處理今次射門，明顯唔合格，睇來「雲佬」要再加多幾錢肉緊教佢哋射波。