安東尼又做觀眾　紅魔鬼生涯進入倒數

曼聯翼鋒安東尼馬菲奧斯繼社區盾全場坐冷板之後，周六(17日)凌晨英超揭幕戰對富咸，亦冇份上陣，進一步增加呢位24歲巴西翼鋒離隊嘅可能性。

曼聯主帥坦哈格由季前熱身賽，到英超開鑼，都比較喜歡用阿密特迪亞路擔任正選右翼，包括社區盾對曼城，以及上場英超對富咸，呢位22歲科特迪瓦國腳都擔正。無獨有偶，坦哈格近2場換人，都係用阿歷真度加拿祖入替阿密特迪亞路，明顯已將「契仔」安東尼馬菲奧斯打入冷宮。

特別係上場對富咸，曼聯久攻不下，84分鐘仍然踢成0比0，坦哈格作出最後1次換人，都唔揀安東尼馬菲奧斯，而係用麥湯米尼入替明奈，擺明覺得就算換入安東尼，都無法提升攻力。

以目前情況睇，安東尼已經淪為「第3右翼」，就算留隊，上陣機會一定少，離隊可能係佢拯救足球事業唯一出路。

至於另1位翼鋒查頓辛祖，更加冇份入選對富咸大軍名單，相信非常大機會離隊。