曼聯慘中「100季魔咒」　入唔到前4位？

英超開鑼，曼聯首戰以1比0擊敗富咸，打響頭炮，今季亦係紅魔鬼第100季出戰頂級聯賽，成為英格蘭球壇史上第5支創出呢項壯舉嘅球隊。不過，翻查歷史，此前4支第100季踢頂級聯賽嘅球隊，該季成績都欠佳，最好只係排第5位，莫非曼聯今季又痛失前4？

在此之前，愛華頓、阿士東維拉、利物浦、阿仙奴都已經突破「百季」頂級聯賽大關，但達到重要里程碑，並唔代表有好成績，4隊之中，以阿仙奴踢第100季頂級聯賽成績最好，該季係2016/17年球季，但其實最終只係排英超第5位。

由於英超只有前4位球隊可以參加歐聯，如果曼聯今季又錯失前4位，就必須捧今屆歐霸盃冠軍，先至可以參加下屆歐聯。