【官宣】回到最初起點　沙基利重投巴素利

瑞士球隊巴素利正式宣布，名將梳頓沙基利回巢，雙方簽約3年，相信會效力至掛靴，呢位32歲翼鋒將會着10號球衣，成為球隊核心。

梳頓沙基利10歲已經加入巴素利青年軍，升上一隊之後效力3年，上陣130場入23球及27次助攻，打出名堂，2012年被拜仁慕尼黑以1,180萬歐元(約1億港元)收購。

梳頓沙基利2015年離開拜仁，輾轉效力過國際米蘭、史篤城、利物浦、里昂，2年前去美職搵食，加盟芝加哥火燄，早前已經解約，最終重返巴素利。

巴素利喺社交網上載一張梳頓沙基利2005年14歲相片同現時相片對照，歡迎佢回歸。梳頓沙基利有份為瑞士參加今屆歐國盃，上陣2場入1球，證明寶刀未老。