施洛英超地標戰奏凱歌　利物浦輕取葉士域治

周六晚（17日）英超早場，利物浦作客升班球隊葉士域治。「紅軍」憑穆罕默德沙拿一傳一射，以2比0輕取對手全取3分，新帥施洛英超地標戰有個好開始，闊別英超22年嘅葉士域治難免要交學費，表現有待提升。

利物浦雖然掌控戰局，但入肉埋門唔多，反而葉士域治屢有反擊威脅紅軍防線，20分鐘森摩斯於右路開出罰球，中堅積及格維斯頭槌一頂，畀艾利臣比加接到實一實，之後奧馬利赫捷臣快放一段後起腳，再被艾利臣比加沒收。37分鐘，葉士域治守將活芬頓剷波解圍差啲變「助攻」，可惜路易斯迪亞斯來遲半步，半場「窿窿」。

下半場紅軍換走查洛爾昆沙，伊巴希馬干拿迪落場，防範對方打突擊，之後攻勢愈嚟愈到肉，56分鐘一次美妙組織攻到入對方心臟地帶，無奈路易斯迪亞斯門前挑射高出，2分鐘後迪亞高祖達頭槌貼柱出界，終於到60分鐘，迪亞高祖達接應沙拿妙傳，近門勁射破網，利物浦領先1比0。

5分鐘後紅軍擴大比數，穆罕默德沙拿成功入楔，同對方門將單對單輕易射成2比0完場，利物浦首輪旗開得勝。