「反骨」杜蘭射爆韋斯咸　即向維拉球迷道歉

周日(18日)凌晨英超，阿士東維拉作客2比1擊敗韋斯咸，為維拉攻入致勝球嘅祖漢杜蘭，今個夏天幾乎轉會韋斯咸，得罪領隊艾美利兼被球迷炮轟「反骨」，不過祖漢杜蘭今場入波將功贖罪後，即場向維拉球迷道歉，重獲球迷歡心。

維拉上季大爆發拎到第4名踢歐聯，今夏大事增兵加強實力，開波4分鐘就由新加盟中場阿馬度奧拿拿先開紀錄，不過韋斯咸亦唔係善男信女，37分鐘由盧卡斯柏基達射入12碼追平。雙方之後進入拉鋸，直到79分鐘，後備上陣嘅祖漢杜蘭接應積及藍斯傳送射入，助維拉2比1贏波。

祖漢杜蘭夏天幾乎轉投韋斯咸，佢更喺網上直播期間，做出雙手交叉嘅韋斯咸招牌手勢，領隊艾美利亦證實呢位哥倫比亞小將提出轉會要求，唔少維拉球迷都插佢反骨。祖漢杜蘭入波後，即去客隊球迷區做出道歉動作，並且雙手指地示意將會留隊。