巴塞反勝華倫西亞　根度簡被飛要求離隊

周日(18日)凌晨西甲賽事，巴塞隆拿憑羅拔利雲度夫斯基梅開二度，作客2比1反勝華倫西亞，為德國教練費歷克拎到「開門紅」。巴塞中場根度簡今場意外被飛出大軍名單，據報呢位德國中場已向球會提出離隊要求，有可能轉戰土超。

巴塞今夏聘請德國教頭費歷克領軍，不過今場贏得驚險，44分鐘被華倫西亞率先攻陷，好在完半場前羅拔利雲度夫斯基接應拉明耶馬傳送追平，換邊後呢位波蘭射手再射入12碼，助巴塞反勝2比1。費歷克係繼韋斯韋拿同拉迪克，巴塞史上第3個德國教頭，而3位德國主帥都順利贏出首場西甲。

不過，根度簡被「飛」就成為話題，據西班牙《每日體育報》爆料，根度簡已向巴塞提出轉會要求，盛傳佢將加盟由摩連奴執教嘅費倫巴治，令有土耳其血統嘅根度簡可以衣錦還鄉。費歷克賽後回應亦唔太肯定：「我同根度簡傾過，內容係秘密，但我覺得佢會留低。」