【有片】格連活特大爆發　曼聯迷：等回購！

英格蘭前鋒格連活特今夏爭議性轉投馬賽，周六(17日)法甲開鑼戰即盡顯身價，梅開二度率領馬賽作客5比1大炒比斯特，「統治性」嘅演出大獲好評，曼聯球迷都期待佢將來可以返英超重披「紅魔鬼」戰衣。

捲入家暴醜聞嘅格連活特，今夏加盟馬賽後受到法國傳媒、政客等批評，不過佢就專心踢好波，法甲首次登場只用3分鐘就征服球迷，佢喺右路高速殺入禁區窄位抽入遠柱，盡顯精湛射術，佢之後再博到12碼並親自操刀建功，助馬賽半場領先3比1。下半場馬賽仍然控制大局，格連活特尾段再次搏到12碼，但佢並冇為「戴帽」而要求操刀，反而讓畀同樣新加盟嘅艾爾華希主射，最終馬賽大勝5比1。

格連活特精彩入球：https://twitter.com/i/status/1824898401336705407　

唔理反對聲音極力簽入格連活特嘅教練迪薩比，賽後大讚：「格連活特係個超級出色嘅球員，好可心佢入波，因為外界針對佢嘅聲音會愈嚟愈少。」見到格連活特大爆發，唔少曼聯迷都話唔捨得，據報曼聯合約內有優先回購條款，唔少曼迷都話期待佢之後重返曼聯比賽。