阿仙奴靠「沙一招」　阿迪達：知道都擋唔到

奪標熱門之一嘅阿仙奴喺英超旗開得勝，周六(17日)晚憑布卡約沙卡1傳1射，主場2比0擊敗狼隊全取3分，自2008至10年之後，首次連續3季開咧戰贏波。領隊阿迪達賽後大讚沙卡「扣大位射門」嘅絕技已爐火純青，一招夠殺！

沙卡上季英超交出16個入波同9次助攻，係阿仙奴進攻命脈，今個夏天踢完歐國盃後缺席大部份季前熱身，不過開鑼戰照舊擔正，而且先助攻夏維斯入波，下半場再喺右路扣入中間大位起左腳抽入，助阿仙奴2比0贏波。

阿迪達賽後被問到，點解對手明知沙卡會扣大位左腳射波，依然畀佢得手，阿迪達就話：「好球員就係咁，你知道美斯會去邊個位同傳咩波，但永遠阻止唔到，你擋唔住沙卡呢招，呢個就係球員嘅質素。」狼隊主帥加利奧尼爾亦認輸：「我唔鍾意輸波，但對阿仙奴係好難踢，我哋已經令阿仙奴冇太多機會，但佢哋把握到兩個高質嘅時刻贏波。」