英超兩老齊破紀錄　情況大不同

英超首周賽事，愛華頓對白禮頓，雙方兩位老將占士米拿、艾舒利楊格一齊打破紀錄，但情況大不同，占士米拿正選上陣，第23季出戰英超，打破曼聯名宿傑斯最多季英超上陣紀錄，協助白禮頓大勝3比0。反觀艾舒利楊格睇住愛華頓吞3蛋之餘，自己亦被逐，以39歲零39日成為英超史上最大年紀攞紅牌球員。

白禮頓今場佔盡上風，由三笘薰、韋碧克、西蒙艾甸格各入1球，輕鬆全取3分，主角占士米拿踢咗82分鐘，以38歲零226日成為白禮頓史上最大年齡英超上陣球員。呢位前英格蘭國腳16歲已經踢英超，至今喺英超累積上陣636次，僅次於653次上陣嘅曼城名宿巴利，相信占士米拿今季好大機會超越巴利，成為英超史上上陣次數最多嘅球員。

至於艾舒利楊格今場踢到66分鐘，拉跌單刀嘅三笘薰，被球證直接出示紅牌趕出場，職業生涯第4次喺英超賽事被逐，今次更加破紀錄成為英超史上最大年紀見紅球員。