李察利臣拒絕離隊　熱刺鋒線爆棚！

熱刺今個暑假大事增兵，上星期用破球會轉會費紀錄6,500萬鎊收購中鋒蘇蘭基後，日前再以3,000萬鎊買入法國翼鋒威爾遜奧度拔，而原本計劃賣走嘅巴西球星李察利臣，已表明無意離隊，令熱刺鋒線出現人滿之患。

李察利臣2年前加盟熱刺後，兩季加埋只得12個聯賽入球，隨住蘇蘭基高價來投，李察利臣個中鋒位置不保，可鋒可翼嘅隊長孫興民又係必然正選，剩番個位仲有古路施夫斯基、比蘭莊臣、迪姆華拿、沙洛文同新加盟嘅威爾遜奧度拔競爭。盛傳熱刺一直希望想賣走李察利臣套現，而沙特阿拉伯球會對佢就虎視眈眈。

不過李察利臣日前回應前途問題，表明今季一定會留效熱刺：「我喺夏天唔放假去練習，希望用最好狀態準備新球季，我從來冇講過唔滿意喺熱刺嘅情況，只係傳媒作出嚟，我一定唔會離開英格蘭！」李察利臣因小腿傷患，錯過熱刺所有季前熱身賽，復出後要爭正選將更加困難。