菲爾鍾斯宣布掛靴　揚言將來做領隊

曼聯後衞菲爾鍾斯上年6月約滿離開紅魔鬼之後，一直未有加盟新球隊，呢位32歲前英格蘭國腳現時終於正式宣布結束球員生涯，並揚言向擔任領隊目標進發。

菲爾鍾斯2011年由布力般流浪加盟曼聯，總共上陣229場入6球及8次助攻，但經常受傷，對上一次為曼聯上陣已經係2022年5月，換言之2022/23年球季完全冇上陣，等到上年6月約滿離隊，當時已被指會收山。

菲爾鍾斯過去1年，曾經擔任足球評述員，並加入曼聯U14及U18青年軍做教練，其實同掛靴冇分別，佢近日接受傳媒訪問，終於承認已經退役，正在積極裝備自己，希望將來成為1位領隊。