辛祖缺陣真相曝光　同轉會無關

曼聯翼鋒查頓辛祖缺陣上場英超揭幕戰對富咸，甚至連後備名單都冇份，一度傳出呢位24歲英格蘭翼鋒準備轉會，但根據領隊坦哈格最新透露，查頓辛祖因為生病倦勤，同轉會無關。

查頓辛祖上季同坦哈格鬧不和，遭到雪藏，並外借去多蒙特，雖然兩人現時已經冰䆁前嫌，辛祖亦有踢季前熱身賽及社區盾，但突然冇份入選上場英超大軍名單，難免惹起猜測，一度傳佢將轉投車路士。

坦哈格開口澄清話：「首先，今季需要充裕人腳，球員狀態非常重要，查頓辛祖近1星期受到耳朵病毒感染，未有100%狀態，雖然佢可以踢，但我傾向用其他球員，球季非常漫長，進行輪換好正常，每位球員都有機會上陣。」曼聯下場英超將於8月24日晚作客白禮頓，查頓辛祖應該有機會復出。