麥巴比亮相失威　皇馬開咧戰慘被逼和

皇家馬德里周一(19日)凌晨西甲亮相，法國前鋒基利安麥巴比首場西甲成為焦點所在，不過呢位「新球王」失威食白果，皇馬作客被馬略卡逼和1比1，教練安察洛堤表明球隊仍未搵到「平衡」，呢個關鍵字似乎會係皇馬衞冕關鍵。

皇馬贏歐超盃後，今場繼續排出麥巴比、雲尼斯奧斯祖利亞、洛迪高高斯同祖迪比寧咸「4條煙」攻擊陣型，13分鐘就由洛迪高高斯射入靚波領先。麥巴比今場亦有4次射門，包括1次射中網側同2次被門將撲出，皇馬未能增添紀錄，53分鐘更被梅利基頭槌頂入。皇馬補時階段仲有費蘭特文迪被逐，最終打和1比1痛失2分。

皇馬教練安察洛堤表示：「我唔滿意和波，因為球隊可以踢得更好、可以有更好嘅態度。我哋欠缺平衡，今場學到好多嘢，因為好多明顯嘅問題出現。」皇馬攻擊線人才濟濟，但要點樣平衡各人嘅攻守任務，將會係安察洛堤最大考驗。