干地回歸意甲即慘敗　等新兵加盟打救

意大利名帥干迪今夏接掌拿玻里帥印，但周一(19日)凌晨回歸意甲首演慘食悶棍，拿玻里作客0比3修敗維羅納腳下，干地賽後亦公開向球迷道歉，並期待有新球員加盟打救。

拿玻里季前轉會唔算活躍，前鋒域陀奧森漢離隊一事遲遲未有定案，今仗更有基華拉斯基利亞半場前傷出，結果拿玻里下半場連失3球，干地回歸意甲首戰即慘吞3蛋。

干地賽後表示：「我要好誠懇咁道歉，因為下半場嘅表現係不能接受，就好似雪喺太陽下融化一樣，我哋應該向球迷道歉，我係教練亦要負上全部責任。」

干地同時表示期待轉會窗完結前有新兵加盟：「可能會有1至4個球員加盟，我哋想要嘅就愈多愈好。」據報巴西翼鋒大衞拿尼斯已到意大利做體測，拿玻里將用3,000萬歐元向賓菲加收購。