阿仙奴棄兵成搶手貨　4意甲球會爭奪

阿仙奴喺英超開鑼戰，將波蘭國腳積及基奧柯踢出大軍名單，預示呢位後防喺球會「冇碇企」，消息引起多支意甲勁旅關注，祖雲達斯、阿特蘭大同米蘭雙雄都準備提出斟介。

積及基奧柯曾效力史柏斯亞，喺意甲打出名堂後上年獲阿仙奴招攬，不過搶唔到正選席位，上季20次英超上陣多數客串左閘，隨住意大利國腳卡拉科利今夏加盟，積及基奧柯喺開鑼戰對狼隊，連大軍名單都入唔到，好可能會被賣走。

呢位24歲波蘭國腳喺意甲獲得頗高評價，據報祖雲達斯、阿特蘭大、AC米蘭同國際米蘭都想簽佢，消息指阿仙奴將同意用「先借後買」方式交易，令成事機會大大增加，預計轉會費1,500萬歐元就可以成交。