域陀連迪路夫拎拐杖現身　隨時滯留曼聯

曼聯今個夏天積極增兵，簽入蘭尼約路、馬菲斯迪歷特兩名新中堅後，傳聞瑞典國腳域陀連迪路夫將被賣走，不過呢位中堅近日被發現傷到要拎拐杖，傷勢似乎相當嚴重，隨時令轉會計劃觸礁。

30歲嘅域陀連迪路夫同曼聯只剩1年合約，中堅排位喺利辛度馬天尼斯、馬菲斯迪歷特、哈利馬古尼、蘭尼約路同莊尼伊雲斯之後，上陣機會渺茫，傳聞費倫天拿同幾間德甲球會都有興趣簽佢，曼聯當然亦樂意放人。

不過，域陀連迪路夫老婆日前喺社交網出片，見到呢位瑞典國腳要用拐杖幫助行路，而且留言寫住「依家做乜嘢都要慢動作」，暗示傷勢唔簡單，喺距離轉會窗唔夠2個星期下，今次傷患好可能令買家卻步，域陀連迪路夫面臨滯留曼聯。