重臨凶地再重創！熱刺中場恐怖爆頭失知覺

熱刺喺英超開咧戰失分兼折將，烏拉圭中場賓坦古亞喺比賽尾段恐怖受傷，同對手爭頂撞爆頭後一度失去知覺，最後仲要吸住氧氣由擔架抬走。原來賓坦古亞對上一次作客李斯特城，就搞到膝部韌帶撕裂長抖8個月，王權球場真係佢嘅凶地！

71分鐘仲係1比1嗰陣，賓坦古亞同法達胡爭頂頭撼頭，賓坦古亞倒地後即時失去知覺兼血流披面，孫興民、占士麥迪臣等隊友見到都掩面露出驚恐神情，經軍醫長時間治理後，賓坦古亞恢復知覺並坐起身，但仍要吸氧氣由擔架抬走。

熱刺領隊普斯迪高路賽後表示：「我未同賓坦古亞溝通，但呢個係頭部傷勢，肯定要好小心咁對待，好消息係佢可以坐起身同講嘢，其他事留畀軍醫處理。」熱刺上次作客李斯特城係23年2月，當時賓坦古亞又係傷出，而且左膝前十字韌帶撕裂足足抖8個月，估唔到再嚟王權球場再受重創。