亨利離開法國U21　「私人原因」請辭

帶領法國U21喺巴黎奧運拎到銀牌嘅亨利，周一(19日)宣布以「私人原因」辭任主帥一職，呢位曾效力阿仙奴同巴塞隆拿嘅傳奇未有透露離隊細節，之前傳聞話威爾斯國家隊有意搵佢執教。

法國U21喺奧運男足決賽輸畀西班牙U21，同法國足總合約到明年先完結嘅亨利，就決定提早解約。法國足總聲明表示：「好多謝亨利嘅貢獻，佢為法國拎到40年來首面奧運男足獎牌，已經實現球隊目標，好遺憾亨利離開嘅決定，祝佢之後發展一帆風順。」

47歲嘅亨利執教生涯成績麻麻，之前做摩納哥同蒙特利爾衝擊主帥都冇表現，有傳做過比利時助教嘅亨利，打算繼續喺國際賽發展，早前傳出威爾斯足總有意請佢執教。