【官宣】白禮頓破紀錄簽前鋒　候命鬥曼聯

英超球會白禮頓周二(19日)官方宣布，成功由列斯聯簽入法國年輕前鋒佐真尼奧魯達，據報白禮頓為奪心頭好，不惜以破球會轉會費紀錄嘅4,000萬鎊，啟動魯達合約內嘅離隊條款，預料呢位22歲前鋒可以喺周六(24日)對曼聯候命上陣。

白禮頓喺開鑼戰3比0大勝愛華頓排榜首，31歲領隊靴斯拿就繼續招兵，同魯達簽約5年後表示：「魯達係有能力令觀眾興奮到彈起嘅球員，佢上季喺列斯聯已證明自己，佢以前效力賀芬咸嗰陣，我已經留意佢，依家要幫佢融入球隊。」

魯達上季喺英冠有7個入波同15次助攻，今季亦喺聯賽同英聯盃上過陣，狀態唔成問題，如無意外可以喺今個星期主場對曼聯處子上陣。