好波有好報！曼城「超級新約」綁實洛迪

曼城今個夏天買人好忍手，不過對挽留球員就唔孤寒，據英國《每日郵報》報道，曼城知道西班牙中場洛迪卡斯簡迪對球隊嘅重要性，所以即使佢仲有3年合約，仍然打算大幅加薪同佢提前續約，將佢依家22萬鎊周薪，加到37.5萬鎊周薪，同挪威前鋒艾寧夏蘭特睇齊。

28歲嘅洛迪係曼城最重要球員，上季英足總決賽輸畀曼聯前，曾創下連續74次為曼城上陣不敗紀錄，曼城上季輸過3場聯賽，都係喺洛迪受傷或停賽嗰陣錄得。呢位中場核心今夏又協助西班牙贏歐國盃冠軍，被譽為金球獎嘅有力爭逐者。

洛迪夏天踢完歐國盃後延遲歸隊，所以並冇參加開鑼戰贏車路士嘅比賽，不過領隊哥迪奧拿就透露，呢位防守中場練習情況良好，預期周六(24日)對葉士域治可以上陣。洛迪對上一次喺英超輸波，已經係上年2月份嘅事。