祖雲達斯提出斟介　史達寧有乜出路？

英超勁旅車路士依家有人滿之患，英格蘭翼鋒史達寧喺開咧戰被踢出大軍名單後，即時要求車路士解釋被棄用原因，隨住另一進攻球員祖奧菲歷斯即將加盟，史達寧「翻身」機會更加渺茫，據報意甲勁旅祖雲達斯已作初步接觸，有望「打救」史達寧。

車路士領隊馬利斯卡稱棄用史達寧係「技術原因」，上場用高爾彭馬同尼干古做兩翼，貴價新兵柏度尼圖下半場入替，仲有梅迪歷同馬度基坐喺後備席，依家準備簽埋祖奧菲歷斯，史達寧更難有立足之地。

最大問題係，史達寧仲有3年32.5萬鎊周薪合約，可以接手嘅球會有限。據英國《每日郵報》報道，祖雲達斯近日初步接觸，先了解交易需要嘅資金，而且呢支意甲球會需要先賣走費達歷高基艾沙，先可以啟動收購行動，時間緊逼。

報道指有沙特阿拉伯球會有意收購，但史達寧同家人就唔想離開歐洲，傳聞紐卡素、水晶宮都考慮提出借用，但係只聞樓梯聲，史達寧去向將成轉會窗關閉前焦點所在。