史達寧再遭雪藏　無緣歐協聯

車路士翼鋒史達寧繼冇份踢上場英超對曼城之後，亦被剔出嚟緊周五(23日)凌晨歐協聯附加賽首回合主場對塞維特嘅大軍名單，意味呢位29歲英格蘭球星已經被領隊馬利斯卡徹底雪藏，好大機會今夏離隊。

史達寧落選上場英超大軍名單之後，透過經理人公司發聲明要求會方解釋，領隊馬利斯卡當時指係「技術性決定」。隨住史達寧再次落選大軍名單，冇份出戰歐協聯，外界相信呢位翼鋒已經唔屬於馬利斯卡組軍計劃之內，離隊只係時間問題。

車路士現時有人滿之患，一隊陣容多達43人，馬利斯卡早前亦指人數太多，令訓練出現困難，準備出售多位球員，當中指明左後衞芝維爾將會離隊，呢位27歲英格蘭國腳同樣冇份入選上場英超及今場歐協聯大軍名單，佢應該會同史達寧一齊「落車」。