曼聯冇收過報價　辛祖焗住留隊

曾經盛傳多間球會有興趣簽入曼聯翼鋒查頓辛祖，但根據《天空體育》最新爆料，紅魔鬼一直冇收過任何球會正式報價，所以呢位24歲英格蘭球星將會留隊。

查頓辛祖上季同領隊坦哈格鬧不和，被外借去多蒙特，今夏返回紅魔鬼之後，雖然將帥關係有好轉，但查頓辛祖始終唔屬於坦哈格心目中嘅主力球員，多次傳出準備出售佢，希望獲得4,000萬鎊(約4億港元)轉會費。

期間傳出祖雲達斯、巴黎聖日耳門、車路士有意簽入查頓辛祖，但一直未有下文，《天空體育》更加指並冇球會向曼聯提出正式報價，今夏出售查頓辛祖嘅計劃，應該無法成事。

另外，荷甲球隊燕豪芬決定放棄收購曼聯左後衞杜維爾馬拉西亞，皆因佢長期養傷，已經超過1年冇參加正式比賽，燕豪芬唔想冒險交易。