科木再出手　將簽3大豪門棄將

意甲新升班球隊科木今夏專門向豪門球員埋手，根據「轉會權威」記者羅曼諾(Fabrizio Romano)爆料，科木教練法比加斯有信心簽入前巴塞隆拿隊長沙治羅拔圖、皇馬中場尼高柏斯、曼城中場佩朗尼。

科木上月簽入曼聯中堅華拉尼，但未開咧已因傷長抖，球隊上仗意甲更以0比3不敵祖雲達斯，法比加斯認為有必要再增兵，頭號係目標沙治羅拔圖，呢位32歲老將今夏自由身離開巴塞隆拿，加上佢同法比加斯曾經係巴塞隊友，相信應該樂意同法比仔合作。

另外，尼高柏斯年僅19歲，皇馬有意將佢外借去其他球會，吸收比賽經驗，至於曼城上季曾經將佩朗尼外借去西甲球隊拉斯彭馬斯，今季準備再將佢外借，科木要借用2人，應該唔難。