利物浦今夏第一簽係佢　但得物無所用

根據《天空體育》等歐洲各大傳媒報道，利物浦即將完成今夏第一簽，就係華倫西亞門將馬馬達舒維利。不過，即使完成交易，馬馬達舒維利都會以借用身份繼續為華倫西亞效力多1季，意味呢位23歲格魯吉亞國腳要等到下季，先至會為利物浦上陣。

據悉馬馬達舒維利今次固定轉會費為2,560萬鎊(約2.56億港元)，另外有430萬鎊浮動轉會費，由於艾利臣比加仍然屬於利物浦正選門將，紅軍原本打算簽入馬馬達舒維利之後，再將佢外借去般尼茅夫，吸收英超比賽經驗，但經過商討後，馬馬達舒維利傾向留喺華倫西亞。

身高1米99嘅馬馬達舒維利2021年加盟華倫西亞後，上陣100場，其中31場保持不失球，佢喺今屆歐國盃亦有出色表現，協助格魯吉亞爆冷打入16強，可惜不敵後來嘅冠軍西班牙。

艾利臣比加已經31歲，加上近年經常受傷，馬馬達舒維利無疑係最佳接班人。