【官宣】紅魔天才翼鋒離隊　網民：重生機會來了

曼聯正式宣布將翼鋒法根度柏利斯查出售畀希臘球隊彭拿典奈高斯，據悉轉會費為510萬鎊(約5,100萬港元)，呢位22歲烏拉圭國腳同彭拿典奈高斯簽約4年。唔少網民都替法根度柏利斯查感到高興，因為近年脫「魔」球員多數可以獲得重生，呢位天才翼鋒事業有望起飛。

法根度柏利斯查落實轉會後，透過社交網發文感謝曼聯：「親愛嘅紅魔鬼，我係時候講再見，呢段無比精彩旅程，令我畢生難忘，我嘅球員生涯及個人成長，都要歸功於曼聯，正如你哋所講，一日紅魔、終生紅魔，曼徹斯特永遠喺我心中佔據特別位置，祝球會、球員、球迷未來一切順利。」

曼聯4年前喺名宿科蘭推薦之下，用900萬鎊向彭拿路收購法根度柏利斯查，但僅為紅魔鬼上陣25場，其餘大部分時間被外借，包括上季下半季被借去西甲球隊CF格蘭納達，上陣15場入2球，可惜球隊最後降班。由於曼聯現時右翼已經有阿歷真度加拿祖、阿密特迪亞路、安東尼馬菲奧斯，法根度柏利斯查成為「冗員」，被出售並唔令人意外。