干拿加歷查亮相馬體會　遇上一大難題

車路士中場干拿加歷查幾經波折之下，終於完成轉投西甲勁旅馬德里體育會，呢位24歲英格蘭國腳亮相馬體會主場，獲得球迷熱烈歡迎，但佢承認唔識西班牙語，或會影響同隊友及球迷溝通。

干拿加歷查上周已飛赴馬德里，準備簽約，但交易出現阻滯，車路士方面叫佢唔使歸隊，放假等消息，情況非常尷尬。幸好最終解決問題，以3,400萬鎊(約3.4億港元)轉會費成交，雙方簽約5年，佢將會着4號球衣。

馬體會方面為干拿加歷查等新兵舉行隆重歡迎儀式，包括放小型煙花，佢入場後用西班牙語話：「大家好，我唔係好識西班牙話，我好開心。」干拿加歷查勝在誠意搭夠，獲得球迷熱烈歡呼。

馬體會今夏大肆增兵，簽入曼城前鋒祖利安艾華利斯、維拉利爾前鋒阿歷山大索洛夫、皇家蘇斯達後衞拿洛文特，加上干拿加歷查，4人總轉會費超過1.8億歐元(約15.6億港元)，4人亦一齊出現今次歡迎大會。