艾歷臣最後道別：希望大家記得我係一位好人

前英格蘭國家隊領隊艾歷臣因為患上末期胰腺癌，生命正在倒數，呢位76歲瑞典名帥近日透過個人紀錄片，向世人作最後道別，佢喺片中話自己生命已步入尾聲，希望留畀世界唔只係一段回憶，更加係一種生活態度同足球智慧，亦想大家記得佢係一位積極嘅好人。

艾歷臣好坦白話：「我哋都害怕死亡嘅一日，但生活確實同死亡相關，必須學會接受呢件事，我希望你哋會記得我係一位積極嘅人，一位努力做好每一件事嘅人，大家唔需要難過，我想你哋一直笑容滿臉，感謝你哋所做嘅一切，教練、球員、球迷，一切都非常好，你哋要照顧好自己，再見。」艾歷臣今年1月透露，自己最多只剩下1年壽命。

艾歷臣曾經執教賓菲加、羅馬、拉素、曼城、李斯特城等多支球隊，包括協助拉素奪得1999/00年意甲冠軍，晉身名帥行列，佢喺教波生涯後期，去過中超及菲律賓搵食。

艾歷臣最為人熟悉一定係2001至06年擔任英格蘭國家隊領隊，出戰2002及06年世界盃，以及2004年歐國盃，但都係8強出局。