證據不足　巴西警方撤銷安東尼家暴控罪

曼聯翼鋒安東尼馬菲奧斯上年被前女友Gabriela Cavallin控告毆打、禁錮、死亡恐嚇等罪行，根據英國《太陽報》報道，巴西警方經過1年調查之後，發現證據不足，決定撤銷對呢位24歲球星嘅控罪。

Gabriela上年接受巴西傳媒訪問，指控安東尼喺佢2022年6月懷孕期間，對佢拳打腳踢，半年之後再毆打佢，導致身體受傷。除此之外，仲有另外2位女子指控安東尼向佢哋施行暴力，但其中1位女子後來放棄控告，當時安東尼極力否認所有指控，並歡迎警方介入調查，證明佢清白。

巴西警方現時作出結案，發現唔到安東尼馬菲奧斯做出家暴行為嘅證據，意味佢已經甩難。安東尼早前表示，唔滿意自己過去1年喺球場上嘅表現，因為近1年發生太多事情，對自己同家人造成困擾，同時成長好多，學識應付逆境。至於安東尼擺脫家暴事件之後，表現能否翻生，大家拭目以待。