柏度尼圖改着7號　史達寧慘成「無碼人」

車路士翼鋒史達寧繼冇份入選上場英超及嚟緊周五(23日)歐協聯大軍名單之後，依家連球衣號碼都冇埋，會方宣布新加盟前鋒柏度尼圖由19號改為着7號波衫，原本7號主人史達寧，並未獲分配新號碼，相信好大機會今個月離隊。

柏度尼圖上場英超對曼城，後備上陣，當時佢着19號球衣，依家成為新7號仔，英國傳媒指，車路士應該會為買咗呢位24歲葡萄牙國腳19號球衣嘅球迷，免費換成7號。至於另1位新兵祖奧菲歷斯獲得14號球衣，值得一提，車路士9號波衫仍然懸空，外界推測車仔可能會收購1位射手。

至於史達寧、杜利奧查洛巴、安祖路加比爾都未有號碼，相信3人離隊已成定局。