咩玩法？曼城想簽古橋亨梧接替艾華利斯

曼城早前將射手祖利安艾華利斯出售畀馬體會之後，需要補充鋒線人腳，根據英國《每日郵報》爆料，「藍月亮」睇中些路迪前鋒古橋亨梧，有意收購呢位29歲日本國腳，但被質疑佢是否夠班踢英超。

古橋亨梧3年前由神戶勝利船加盟些路迪，為呢支蘇超球隊上陣135場入73球，捧過7項冠軍，些路迪領隊羅渣士大讚佢屬於天才級射手，依家更加吸引曼城主帥哥迪奧拿注意，希望收購古橋亨梧，作為艾寧夏蘭特嘅副選。

古橋亨梧仲有3年合約在身，據悉些路迪願意出售呢位猛將，但要求最少2,000萬鎊(約2億港元)轉會費。普遍輿論認為些路迪獅子開大口，因為古橋亨梧已經29歲，加上佢過去3季蘇超，除咗2022/23年球季入27球之外，其餘2季聯賽分別只有12、14球進帳，水準飄忽，英超比賽水平遠高於蘇超，古橋亨梧能否適應亦成疑問。