【官宣】達米安馬天尼斯續長約　想留隊至收山

阿士東維拉正式宣布，同門將達米安馬天尼斯續約至2029年夏天，意味呢位阿根廷國腳約滿時，已經接近37歲，似乎想留隊至收山。

達米安馬天尼斯早於14年前已經去英國搵食，加入阿仙奴青年軍，升上一隊之後長期被外借，直至2020年9月正式永久離開兵工廠，加盟阿士東維拉。呢位鋼門大器晚成，近年憑出色表現，成為英超最佳門將之一，至今為維拉總共上陣160場，有54場保持不失球。

達米安馬天尼斯最犀利係踢國際賽，以正選身份協助阿根廷捧2022年世界盃冠軍，並當選賽事最佳門將，亦獲得2022年國際足協最佳門將殊榮，佢亦係阿根廷連奪近2屆美洲盃冠軍嘅功臣。

阿士東維拉留住達米安馬天尼斯，對於穩定後防大有幫助。