巴塞新星變水貨　將外借貝迪斯

巴塞隆拿上年夏天向巴甲球隊帕拉尼恩斯收購天才前鋒洛基費拉拿，以為執到寶，但呢位19歲射手今年1月正式加盟巴塞隆拿之後，表現令人失望，現時面臨被「流放」，根據「轉會權威」記者羅曼諾(Fabrizio Romano)爆料，巴塞隆拿方面已經同意將洛基費拉拿外借去貝迪斯。

洛基費拉拿上季為巴塞隆拿上陣14場入2球，大部分賽事都係後備披甲，季尾甚至被時任主帥沙維雪藏，引起其經理人不滿。雖然沙維已經離隊，但新帥費歷克亦無意留用洛基費拉拿，佢今季並冇獲分配球衣號碼。

巴塞近期積極搵球會接貨，希望騰出薪酬空間，葡超球隊士砵亭有意簽入洛基費拉拿，但佢傾向留喺西甲，現時好大機會以借用身份加盟貝迪斯。

據悉兩間球會已經達成口頭協議，現時只剩下借用期長短，仍然未傾掂數，但相信問題不大。