C朗入波都冇用　豬隊友累事艾納斯開鑼戰失分

新一季沙特職開鑼，葡萄牙巨星C朗繼早前沙超盃入波之後，今場聯賽又建功，為艾納斯先開紀錄，但隊友唔生性，下半場被判罰12碼，主場遭艾拉德逼和1比1，可謂出師不利。

艾納斯上場沙超盃決賽，C朗率先入波，但最後卻以1比4大敗於希拉爾腳下，呢位39歲葡萄牙國腳不滿隊友表現，憤而拒絕領取亞軍獎牌。

來到聯賽，艾納斯又重蹈覆徹，34分鐘沙迪奧文尼左路傳中，C朗勁頂入波，成為史上首位連續25季聯賽有波入嘅球員，以為可以打響頭炮，但換邊後僅3分鐘，艾納斯中堅拿樸迪喺禁區內拉跌對手，球證睇完VAR之後判罰12碼，艾拉德由中場科沙主射入網扳平1比1。

艾納斯之後創造唔少入波機會，但往往失之交臂，包括前鋒塔利斯卡頭槌攻門中柱，C朗入波被吹越位，注定失2分。早前傳出C朗要求會方踢走4位外援球員，據悉拿樸迪係其中一位，呢位西班牙國腳今場犯錯，睇怕會成被清洗頭號目標。