高爾彭馬受傷疑雲　馬利斯卡咁回應

車路士喺歐協聯附加賽首回合主場以2比0擊敗塞維特，賽後王牌球星高爾彭馬一拐一拐步離球場，疑似受傷，領隊馬利斯卡透露，呢位22歲英格蘭國腳傷勢輕微，應該可以出戰周日(25日)晚英超作客狼隊。

車仔今場收起唔少主力，高爾彭馬等到58分鐘後備上陣，入替射失空門嘅馬克基爾。雖然呢位進攻中場只係踢咗30幾分鐘，但賽後神情顯得辛苦，迅速離開球場，似係趕住入更衣室接受治療。

馬利斯卡被傳媒問到高爾彭馬勢傷時，佢話：「彭馬感到有啲唔妥，已經為佢進行檢查，情況良好，有信心佢可以踢周日英超。」高爾彭馬上季英超入22球及11次助攻，佢表現好壞對於車路士有關鍵性影響。