阿仙奴斟掂西班牙硬漢　馬連奴將簽約4年

阿仙奴爭取收購皇家蘇斯達中場米基爾馬連奴，已經一段時間，依家終於取得突破，根據「轉會權威」記者羅曼諾(Fabrizio Romano)爆料，兩間球會已接近達成協議，馬連奴將以3,200萬歐元(約2.8億港元)固定轉會費及500萬歐元(約4,300萬港元)浮動轉會費，加盟兵工廠，並簽約4年。

阿仙奴早於7月底，幾乎可以簽入米基爾馬連奴，但其後出現阻滯，皆因仲有2間球會提出收購馬連奴。由於呢位28歲西班牙國腳只剩下1年合約，加上一心想加盟兵工廠，皇蘇現時惟有讓步接受阿仙奴報價，如無意外，雙方將會簽約至2028年6月，並有權續約多1年。

米基爾馬連奴對於英超並唔陌生，佢曾於2017/18年球季效力紐卡素，其後轉投皇家蘇斯達，上季各項球會賽事上陣45場入8球，並有份協助西班牙捧今屆歐國盃冠軍，阿仙奴簽入呢位中場硬漢，可以進一步提升爭標實力。