沙特職葡國勢力壯大　簡斯路加盟希拉爾

沙特阿拉伯聯賽將再迎來1位葡萄牙國腳，根據葡萄牙《球報》爆料，沙特冠軍希拉爾已經同曼城達成協議，以4,000萬歐元(約3.5億港元)收購「藍月亮」後衞祖奧簡斯路，預料雙方將於周六(24日)簽約3年，意味佢可以喺沙特同C朗、奧達維奧艾美臣等葡萄牙同胞大鬥法。

祖奧簡斯路因為同曼城領隊哥迪奧拿不和，近2季分別被外借去拜仁慕尼黑、巴塞隆拿，原本巴塞有意買斷呢位30歲「帶刀侍衞」，但最後不了了之。希拉爾近日向曼城提出收購祖奧簡斯路，一拍即合，曼城可以收回4,000萬歐元轉會費，祖奧簡斯路獲得一份薪酬總值7,000萬歐元(約6億港元)嘅3年合約，可以話係雙贏。

希拉爾現時由葡萄牙名帥佐治捷西斯執教，陣中已有1位葡萄牙國腳魯賓尼維斯，祖奧簡斯路加盟之後，有同胞照應，有助融入球隊。