利物浦拒同VVD續長約　已有接班人選

利物浦中堅華基爾雲迪積克(VVD)只剩下唔夠1年合約，雙方續約問題出現分歧，盛傳紅軍考慮到呢位荷蘭國腳已經33歲，拒絕開出長約，並計劃以7,000萬鎊(約7.2億港元)收購愛華頓中堅班夫韋迪，作為VVD接班人。

據悉利物浦唔願意向華基爾雲迪積克開出3年新約，甚至2年都有難度，至於1+1年合約，VVD未必接受，令續約進度停滯不前。英國《太陽報》指利物浦已經有兩手準備，計劃用7,000萬鎊買班夫韋迪，重組防線。

現年22歲嘅班夫韋迪獲得多間大球會垂青，曼聯曾經提出收購，但未能成功，佢仲有3年合約在身，愛華頓可以吊高來賣。利物浦開出7,000萬鎊，已經好接近愛華頓要求，同時向班夫韋迪提供18萬鎊周薪合約，係佢現時人工嘅3倍，相信亦會令呢位新星心動。

不過，愛華頓同利物浦屬於同市宿敵，「拖肥糖」願唔願意賣呢位猛將畀紅軍，成為疑問。