芝維爾落「車」　暗示去曼聯

車路士左後衞芝維爾好大機會離隊，根據《talkSPORT》報道，曼聯有意簽入呢位27歲英格蘭國腳，芝維爾曾經暗示自己係曼聯球迷，今次有機會實現成「魔」童年夢想。

曼聯2位左後衞杜維爾馬拉西亞、勞基梳爾受傷長抖，新簽嘅馬沙拉奧司職右後衞，紅魔鬼現時左閘得番達洛治及17歲小將哈利阿馬斯，明顯比較薄弱，所以向芝維爾招手。

芝維爾上年6月接受訪問時，承認對曼聯有一份情意結：「我童年時候經常同身為曼聯球迷嘅爸爸去睇波，我第一次入場睇波就係曼聯主場歐聯比賽，已經唔記得對手係邊隊，當時感覺非常好。」

芝維爾現時周薪達20萬鎊(約200萬港元)，恐怕只有少數大球會願意負擔呢份人工，曼聯屬於其中之一。