比寧咸受傷抖1個月　無緣出戰歐國聯

西甲勁旅皇家馬德里繼上場聯賽開鑼戰和波失分之後，再受打擊，中場主將祖迪比寧咸因為患上足底筋膜炎，需要休息1個月，估計將缺陣未來3場聯賽，並且無法為英格蘭出戰下月初2場歐國聯對愛爾蘭及芬蘭。

祖迪比寧咸上場西甲對馬略卡，踢到88分鐘被換離場，當時並冇異樣，皇馬最新發表聲明，指呢位21歲英格蘭國腳患上右腳足底筋膜炎，將會繼續接受觀察，西班牙傳媒指祖迪比寧咸需要抖1個月，換言之，皇馬周日(25日)晚聯賽主場對華拉度列，以及之後對拉斯彭馬斯、貝迪斯都唔使預佢，相信會由巴謙戴亞斯代替比寧咸，擔任正選進攻中場。

與此同時，祖迪比寧咸未能為英格蘭踢嚟緊2場歐國聯，呢2場比賽係「三獅兵團」新看守領隊卡斯利首度領軍，冇咗比寧咸助攻，估計佢會將菲爾科頓移入中路，安排安東尼哥頓踢左翼。英格蘭將於9月8日凌晨作客愛爾蘭，3日之後主場對芬蘭。