盧卡古「真落車」　將同拿玻里簽約3年

車路士終於成功搵到買家接走前鋒盧卡古，根據歐洲各大傳媒報道，車仔已經同拿玻里達成協議，以3,000萬歐元(約2.6億港元)固定轉會費及1,500萬歐元(約1.3億港元)浮動轉會費，將盧卡古出售畀呢支意甲勁旅，呢位31歲比利時國腳將會同拿玻里簽約3年，結束過去2季外借生涯。

盧卡古3年前重投車路士，但表現欠佳，過去2季分別被外借去國際米蘭、羅馬，加上車仔現時有嚴重人滿之患，更加冇收留盧卡古空間。由於拿玻里新帥干地曾經同盧卡古合作一齊為國米捧意甲冠軍，對佢念念不忘，積極拉攏「渣古」加盟，雙方早前已達成個人待遇條款，只係等兩間球會完成交易，依家終於拍板。盧卡古上季為羅馬各項賽事上陣47場入21球，表現不俗。

拿玻里簽入盧卡古之後，極大機會出售前鋒域陀奧森漢，車路士一直有意收購呢位25歲尼日利亞國腳，兩間球會隨時會再進行多一單交易。