車仔繼續大清貨　Kepa將外借般尼茅夫

車路士今季出現嚴重人滿之患，一隊球員超過40人，近期積極清貨，最新消息指，會方準備將門將阿列沙巴拿加(Kepa)外借去另一支英超球隊般尼茅夫。由於呢位29歲西班牙國腳只剩下1年合約，車仔可能先同佢續約再外借，以免明夏人財兩失。

阿列沙巴拿加2018年以8,000萬歐元(約7億港元)轉會費由畢爾包加盟車路士，成為史上最高身價門將，但表現一直欠佳，上季外借去皇馬，作為副選門將，獲得西甲及歐聯冠軍。

車路士今夏簽入維拉利爾門將佐真遜之後，已經有多達6位門將，阿列沙巴拿加再次被「流放」，並唔令人意外。

般尼茅夫領隊伊拉奧拿係畢爾包名宿，非常渴望搵後輩阿列沙巴拿加幫手，如果佢願意加盟，肯定可以穩坐正選。