曼城未撻着 半場獻「細」格
2024年08月24日 18:00
東網電視
更多新聞短片
英超曼城主場迎戰葉士域治。
英超曼城主場迎戰葉士域治。「藍月亮」雖然首輪贏波，但明顯未夠弗，而且近年對親升班球隊例牌慢熱；葉士域治上仗鬥利物浦有板有眼，初段頂到「藍月亮」唔奇，1.5球半場細捧得過。（Now 621周六晚10時直播）
曼城今夏冇乜特別增兵，前鋒祖利安艾華利斯更轉投馬體會，佢哋早前拍跳成效麻麻，班波似乎未入局，先喺社區盾憑互射12碼擊敗曼聯，之後聯賽開鑼戰贏車路士2比0，主帥哥迪奧拿刻意收起喺歐國盃踢到較後階段嘅幾位國腳，包括基爾獲加、史東斯及尼敦阿基，另一英格蘭國腳菲爾科頓後備落場亦無甚佳作，全隊確係要時間提升狀態。
事隔22載重返英超嘅葉士域治，首輪遇上勁旅利物浦，初段靠體力化打法同快速反擊，攻勢更入肉，可惜搏得太盡，下半場體力不繼短時間內連失兩粒，明顯輸經驗，演出雖敗不辱，亦證明球隊有氣有力下，有本錢同列強周旋。
仲有一點要留意，曼城近5次聯賽對住升班球隊，4次半場開1球或以下，面對踢法硬淨嘅葉士域治，初段未必佔到甜頭，半場細有計。
更多賠率：