根度簡同曼城簽約1年　親自解釋回巢原因

根度簡日前離開巴塞隆拿之後，正式以自由身回巢曼城，雙方簽約1年，並有權選擇續約多1年，呢位33歲德國老將表示，非常懷念效力「藍月亮」7年歲月，同時認為自己仍然充滿雄心壯志，具備競爭能力，所以決定重返最佳球會曼城。

根度簡上年夏天約滿離開曼城，轉投巴塞隆拿，上季為巴塞各項賽事上陣51場入5球，但上場西甲對華倫西亞，冇份入選大軍名單，據報當時佢已提出離隊，一度傳出可能轉戰土超，結果最終重返曼城。

根度簡簽約後話：「過去效力曼城7年係我決定回巢重要因素，我非常了解呢間球會，喺呢度有好多朋友同回憶，雖然我已經33歲，但仍然充滿雄心，希望發揮最佳狀態，我對勝利及競爭有一份非比尋常嘅執着，加盟曼城可以滿足我要求，其他地方搵唔到。」根度簡以前效力曼城着8號，但呢個號碼現時屬於高華錫，所以佢將會着19號球衣。

曼城領隊哥迪奧拿表示，根度簡回巢屬於意料之外，認為佢具備高水平狀態及穩定性，好高興佢回歸。