曼聯又有收穫　簽18歲天才防中

曼聯今夏積極增兵，根據英國各大傳媒報道，紅魔鬼已經同意以100萬鎊(約1,030萬港元)收購18歲防守中場施高干尼，等下周通過體測，就會完成交易，呢位馬里新星今季將會先加入曼聯U21磨練，屬於球會「長期投資」。

施高干尼雖然只係效力非洲馬里球會加達斯，但憑上年U17世少盃嘅出色表演，引起歐洲各大豪門注意，包括曼聯、利物浦、薩爾斯堡加入爭奪，結果由紅魔鬼勝出。

據悉曼聯主帥坦哈格非常欣賞施高干尼，視佢為球隊未來正選「6號球員」，曼聯新股東拉特克利夫一直提出要將球隊年輕化，今夏加盟其中1位新兵蘭尼約羅都係18歲，佢同施高干尼將成為紅魔鬼未來骨幹人物。