夏蘭特連中三元　曼城輕取葉士域治

周六晚(24日)英超10點場，曼城主場迎戰升班球隊葉士域治，開賽先失波嘅「藍月亮」，憑艾寧夏蘭特連中三元，加上奇雲迪布尼開齋，輕易以4比1反勝對手，開季二連勝。

兩隊實力差距頗大，主場嘅曼城全場控制戰局，但就先被葉士域治偷襲得手，斯莫迪斯突破越位單刀，射穿艾達臣摩拉斯大細龍門，7分鐘葉士域治領先1比0。

曼城不慌不忙保持進攻節奏，12分鐘博得12碼，艾寧夏蘭特主射扳平1比1，2分鐘後葉士域治門將艾利真歷梅歷治送大禮，奇雲迪布尼搶在夏蘭特起腳之前快射空門，曼城極速反先2比1。

再過2分鐘，夏蘭特左路單刀推過艾利真歷梅歷治，挑射送入空門，曼城贏到3比1。取得兩球差距，曼城球員開始玩花巧足球，先後有歷高利維斯同奇雲迪布尼射門攞得太盡，兩次中楣不入，半場曼城領先3比1。

下半場曼城練波咁練，保持控球，將比賽提前帶入垃圾時間，就連最近回巢嘅根度簡都有得落場，葉士域治亦無力反撲，88分鐘夏蘭特突然射死角入網，個人連中三元，曼城贏到4比1完場。