史上第4人　布卡約沙卡一項紀錄媲美兩大名宿

阿仙奴周日(25日)凌晨英超以2比0擊敗阿士東維拉，對於翼鋒布卡約沙卡有特別意義，因為呢位英格蘭國腳取得職業生涯第100場英超勝仗，成為繼朗尼、法比加斯、菲爾科頓之後，英超史上第4位23歲之前，達到100勝大關嘅球員。

布卡約沙卡當年18歲就為阿仙奴出戰英超，並迅速穩坐正選之位，至今已為兵工廠踢咗172場聯賽入48球，今場比賽當日係佢22歲零354日，貢獻1次助攻，協助阿仙奴贏波，自己亦成為英超史上第4位未滿23歲嘅「100勝」球員，亦係第3年輕獲此成就嘅球員，僅次於曼聯名宿朗尼(22歲零87日)、阿仙奴前輩法比加斯(22歲零180日)，至於曼城中場菲爾科頓以22歲零358日排第4位。

布卡約沙卡繼今季首輪聯賽對狼隊，射入1球及1次助攻之後，今場又有1次助攻，換言之開季2戰已創造3個入波，狀態非常勇猛，成為兵工廠爭標重要武器。